إنتوا عارفين إن الحب مهم في كل حاجة في حياتنا.
د. باهي هاني / د. هاجر حسين
حبك لنفسك مش بس لازم يكون إن شكلك حلو، دا جزء مهم أكيد، بس دا بيحتاج منك إنك تهتم بكل النواحي، جسمك وروحك وصحتك، وكل جزء فيك بتحبه بجد هتخليه أحسن، عشان كده اهتمامك بنفسك دا حاجة مهمة طبعًا.
اهتمامنا بالأكل يفرق كتير في صحتنا، وإننا نلعب رياضة بيفرق برضه في صحتنا، فطبعًا لو بنحب نفسنا أكيد هنخليها أحسن، وخليك دايمًا بتفكر لو إنت دا شخص بتحبه ممكن تفكر تعملوا إيه، حبوا نفسكم بجد الموضوع مختلف.
عمرك فكرت إنك تهتم بروحك، إنت أول مبتسمع كده بتروح طبعًا على علاقتك بربنا، دا طبعًا جزء كبير ومهم، بس دا مش كل حاجة، اهتمامك بروحك بيكون إنك تتواصل مع نفسك أكتر، ممكن تقعد ساعة مع نفسك، تلعب يوجا، تسمع موسيقى هادية، المهم إنك تلقى حاجة تغير مودك وتخليك عارف تتواصل أكتر مع نفسك.
خليك فاكر برضه إن الحب من أكتر المشاعر المحفزة اللي بتقدر تخلينا نكمل على الهدف بتاعنا، عشان دا بيخلينا نقدر نكمل ونوصل، طول ما أنت بتحب نفسك هتفضل تكمل، مهما وقعت هتقوم وتكمل تانى عشان أنت دايمًا تستاهل الأحسن.
