أكتر من مجرد عطش.. لماذا يستمر جفاف الفم وما هي الرسائل التي يرسلها جسمك؟
كتير مننا بيصحى من النوم حاسس إن ريقه ناشف، أو بيحس بجفاف الفم طول اليوم ومهما شرب مية الإحساس مش بيروح. في الغالب بنفتكر إن ده بسبب الجو أو قلة شرب السوائل، بس الحقيقة الطبية بتقول إن اللعاب ده “سائل سحري” وظيفته حماية الفم والهضم، ولو قلّ بزيادة يبقى فيه خلل لازم ندور وراه. جفاف الفم المستمر (Xerostomia) ممكن يكون عرض لحالات صحية محتاجة تدخل، ومش مجرد إحساس عابر.
الآثار الجانبية للأدوية أكتر سبب شائع لجفاف الفم هو الأدوية. فيه أكتر من 400 نوع دواء، زي أدوية الضغط، الحساسية، الاكتئاب، وحتى بعض مسكنات الألم، بتأثر بشكل مباشر على الغدد اللعابية وبتقلل إفرازها. لو بدأت دوا جديد وحسيت بريقك ناشف، يبقى هو ده السبب وعليك مراجعة طبيبك.
مرض السكري غير المنضبط جفاف الفم هو واحد من أشهر علامات “السكر العالي”. لما مستويات السكر بتزيد في الدم، الجسم بيحاول يتخلص منها عن طريق البول، وده بيسبب جفاف عام بيبان أولاً في الفم. لو الجفاف ده معاه جوع مستمر أو زغللة في العين، لازم تعمل تحليل سكر صايم وفاطر فوراً.
متلازمة “شوغرن” والمناعة فيه حالات تانية بتكون مرتبطة بجهاز المناعة، زي “متلازمة شوغرن”، ودي حالة بتخلي المناعة تهاجم الغدد اللي بتفرز السوائل في الجسم (زي الدموع واللعاب). لو حسيت بجفاف في عينك مع جفاف الفم، يبقى لازم تتوجه لدكتور روماتيزم ومناعة عشان تتطمن.
التنفس من الفم أثناء النوم لو عندك ضيق في التنفس أو مشاكل في الجيوب الأنفية وبتضطر تنفس من بقك وإنت نايم، ده بيخلي اللعاب يتبخر تماماً ويسبب جفاف شديد وجروح في اللثة وصعوبة في الكلام أول ما تصحى. علاج المشكلة بيبدأ من “الأنف” مش من الفم.


