مراجعة لفيلم درويش بدون حرق الاحداث
قصة الفيلم : الفيلم بيتكلم عن نصاب اسمه درويش عايش فى فترة الاربعينات بيعمل عملية من خلالها بيتورط فى مشاكل كتير ومرة واحدة بيحصل حدث يخليه بطل شعبي والناس بتهتف بأسمه فى الشوارع والانجليز بتدور عليه
وزى ما توقعنا تقريبا ده افضل الافلام اللى نزلت السينمات الفترة اللى فاتت
عمرو يوسف بشكل مختلف ودور جديد فهمت ليه هو كان متحمس للفيلم بالشكل ده ❤️
دينا الشربينى من احلى الحاجات فى الفيلم من بداية ظهورها للنهاية
مصطفى غريب رغم انى كنت قلقان بسبب ان الفيلم بيدور فى فترة الاربعينات وده ممكن يخليه مش واخد راحته اوى فى الكوميديا والايفيهات اللى بتتقال لكن هو ظبطها وفى نفس الوقت مخلاش الضحك اوفر لدرجة انه يبوظ الفيلم
محمد شاهين لذيذ جدا ومش ضيف شرف فى الفيلم هو دوره كبير لكن ظهر فى النص التاني حاجه كده شبه دور ليوناردو فى فيلم django unchained
تارا عماد اتفاجأت جدا لما عرفت ان فى مشاهد معينة فى الفيلم عملتها بنفسها رغم انها صعبة جدا
خالد كمال واحمد عبدالوهاب وباقي الممثلين كلهم ممتازين وقدموا دورهم على اكمل وجه
وسام صبري كتب قبل كده اعمال كتير حلوة زى عمهم وشقو ومسلسل رشيد بس كان عنده مهمة صعبة فى الفيلم ده
لأن نوعية الأعمال محتاجه دراسة للحقبة دى من الزمن وخصوصا انه اول مرة يكتب حاجه من الحقبة دى لكن عملها حلو وبالنسبالي الفيلم كان متقسم 3 فصول الفصل الاول والتانى ممتازين والفصل اللى فى النص حسيت انه طول شوية بس
لكن فى المجمل اتبسطت
اخراج وليد الحلفاوي عظيم خصوصا فى الفصل الاول اللي اتقدم فيه صورة بصرية ممتعة للشوارع المصرية فى الاربعينات والمظاهرات والناس فى الوقت ده
وبكده يكون وليد الحلفاوي نجح انه يكسب ثقة الجمهور بعد ما قدملنا مسلسل كتالوج اللى عجب ناس كتير ووراه على طول فيلم درويش اللي متأكد برضه انه هيعجب ناس كتير وقبلها كان مقدملنا واحد من افضل الافلام فى الفترة الاخيرة وهو وش في وش
فى النهاية انا اتبسطت بالتجربة جدا وتقييمى للفيلم هو ٨/١٠
عن صفحه #المراجع
