معلومات هامة عن مريض السكر والضغط.
د. ألاء عبد الغني
مريض السكر
المعروف إن السكر نوع أول أو تاني.. النوع الأول بيظهر منذ الصغر أنسولين، والنوع التاني بيبقى نتيجة السمنة وسوء الـlifestyle وبعض الجينات الوراثية ومقاومة الأنسولين، وده بياخد أدوية، وقليل اللي بياخد أنسولين.
طيب كنظام أكل هل ألغي النشويات؟
للنوع الأول أو اللي بيعتمد على الأنسولين، لو أنت لاغي النشويات ده مش هينقذك من مرض السكر، ده في الحالة دي كمان بيدخلك في حاجة اسمها Ketoacidosis، وده نتيجة تكون الـketone bodies وتراكمها وعدم تخلص الجسم منها، وده بيؤدي إلى خلل كيميا الجسم الذي قد يؤدي للموت.
أما عن النوع التاني، فله نسبة النشويات اللي يستطيع الجسم والبنكرياس والأنسولين الطبيعي للجسم التخلص منها، فبالتالي له نسب طبيعية اللي هي من ٤٥- ٦٥٪، مع اختيار النشويات المعقدة والألياف.
وأهم أكل لمريض النوع التاني MUFA اللي هي الدهون المفيدة الأحادية غير المتشبعة، اللي أشهرها زيت الزيتون والأفوكادو وبعض المكسرات النية، وطبعًا احتياج مريض السكر للبروتين قليل إلا لو رياضي، عشان كده لما تتابع مع دكتور تغذية بيتابع معاك كمريض سكر لازم تعرف النقط دي، كمان لازم تراقب السكر التراكمي كل ٣ شهور، والكوليسترول والدهون الثلاثية.
مريض الضغط
الضغط له أسباب وعوامل كتير قوي.. جزء منه وراثي أكيد، وجزء بقى مرتبط بالضغط النفسي وقلة النوم والسجاير، وحط تحت السجاير خط، والسمنة طبعًا وزيادة نسبة الكوليسترول في الدم وطريقة الأكل السيئة وقلة الحركة.
طيب إيه النظام المتبع له؟
أولًا لازم تخفف السجاير وتمارس رياضة تخرجك من الضغوط النفسية دي حتى لو مشي، وطبعًا فيه حاجة اسمها اليوجا والـmeditation، وشرب المية وتقليل الأملاح، واللي بيشرب كافيين كتير ومياه غازية قهوة وشاي ومشروبات طاقة يقلل، طبعًا نحاول ننزل الوزن بس بأكل يناسب مريض الضغط، مش تمنع نشويات وتزود بروتين عشان ده هيخرب الدنيا أكتر.
أومال أعمل إيه؟ زود فاكهة وخضار ده مهم وخصوصًا الغنية بالبوتاسيوم زي الموز والأفوكادو، وزود الكالسيوم بتاعك في صورة الألبان والزبادي ده مهم لأن الكالسيوم له عامل مهم جدًا في تنظيم الضغط، قلل الدهون المشبعة اللي في اللحوم الحمرا، زود أسماك مرتين ٣ في الأسبوع، زود أكلات نباتية أكتر زي العدس، زود دهون مفيدة زي زيت الزيتون
والأفوكادو والمكسرات النية، والغي الدهون المهدرجة من أكلك، ولو تدخل الصيام المتقطع في طريقة حياتك هيبقى كويس قوي إلا لو كنت مريض سكر نوع أول هيبقى ممنوع الصيام ليك.. الأعشاب، اشرب بذور بقدونس وشعير بينزلوا المية من الجسم.
أما بقى عن احتياجك للسعرات الحرارية ونسبة الأكل، فده كل واحد حسب وزنه ونشاطه الحركي.. تقدر تنزل وزن صحى مع الضغط والسكر بالمتابعة مع دكتور متخصص.
دمتم بصحة
