يا ترى إيه العلاقة بين الشهية والرشاقة ؟
طبعًا في علاقة كبيرة بين الشهية والرشاقة وهي الرغبة في تناول نوع معين ومحدد من الطعام، وبيكون سهل التغلب على الرغبة دي في أغلب الأوقات، خصوصًا لو عندك هدف وعزيمة إنك تكمل في حياة صحية، وتوصل لحاجة معينة.
طيب إمتى تتحول الشهية دي وتكون عدوك اللدود في حياتك الصحية؟
في بعض المواقف زي:
عدد ساعات النوم غير الكافي لجسمك أو مواعيد النوم الخطأ، ده بيتسبب في لخبطة في هرمونات الجسم، خصوصًا هرمون الشبع وهرمون الجوع، فبالتالي تفضل طول اليوم جعان ومش متحكم في شهيتك على الإطلاق.. ده غير إن هرمون النمو بيفرز ليلًا وقت النوم العميق.. وده بيساعد في بناء العضل وبيزود الحرق، فبالتالي لو نومك مش مظبوط.. للأسف شهيتك وحرقك مش هيكونوا كويسين.
كمان وقت البيريود كل شهر للبنات، ده من أصعب الأوقات، ممكن تفقد فيها السيطرة على الشهية، لأن هرمون التوتر زي الكورتيسول بيكون عالي جدًا وده بيحبس المية وكمان يخلينا ناكل كتير، وللأسف هرمون الاستروجين المسئول عن المزاج الحلو قليل في الجسم، فالنصيحة هنا إننا ناكل أنواع من الأكل تعلي من هرمون الاستروجين فنتحكم في شهيتنا زي «المكسرات، الشوفان، الدارك شوكليت، الفاكهة الغامقة زي التوت والفراولة».
آخر سبب ممكن يخلينا نفقد السيطرة على شهيتنا هو نوع الطعام نفسه، يعني لو أغلب وجبتك نشويات بسيطة زي الأرز، العيش، المكرونة، المعجنات، أو بتاكل سكريات كتير ده هيجوعك على طول ومش هتحس بأي شبع بسبب هرمون الأنسولين اللي زاد بنسبة كبيرة بعد كمية النشويات دي، هيبقى صعب التحكم في جوعك أو حتى نوع الأكل اللي داخل جسمك.
نعمل إيه بقى عشان نتحكم بكل سهولة في شهيتنا وبطرق طبيعية كمان:
– اهتم إن يكون جزء كبير من وجبتك بروتين وألياف زي الخضار والسلطة.
– اهتم بشرب المية على مدار اليوم.
– نام عدد ساعات كافي من 8 – 10 ساعات يوميًا.
– ممارسة الرياضة بتقلل من هرمونات الجوع وتقلل كمان من شهيتك.
– عدم تناول الطعام أمام الشاشة زي شاشة التلفاز أو التليفون.. ده هيساعدك تتحكم في الكمية.
دومتم بصحة
