نهاية فيلم الفرح واحدة من احلى النهايات السينمائية اللي شفتها اخر 20 سنة
كانت نهاية فيلم الفرح، للمؤلف أحمد عبد الله اللي اتوفي النهاردة، والمخرج سامح عبد العزيز، وكلاهما كان في افضل حالاته.
زي ما حكيتلك فيلم الفرح اتبنى على النهاية الاصلية لفيلم اللمبي.. اللي هو كان المفروض اللمبي ينتهى بان امه فرنسا تموت.. فهو يقرر انه يخبى الجثة علشان يكمل الفرح.. فلما النهاية دي اتفرمتت واتشالت..
اسرها احمد عبد الله في نفسه.. وقرر يعملها فيلم لوحده.. فيلم حلو ومختلف.. من افلام اليوم الواحد.. الفيلم بيدور كله في يوم واحد وبنشوف قصص كتير متقاطعة ومتوازية مع الحدوتة الاصلية وبتصب في مصلحة الحدوتة في الاخر..
المهم يعني، في مشهد النهاية بعد ما الفلوس بتتسرق، والفرح بيبوظ بكل اللي انت شفته اللي قتل واللي اتكسف قدام ابنه واللي رقصت وهي واكلة ضرب يكفي شارع.. فـ بتنزل الاية الكريمة “وَلَوْ كُنتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ ۚ إِنْ أَنَا إِلَّا نَذِيرٌ وَبَشِيرٌ”…
وتفسير الاية، إن الرسول صلى الله عليه وسلم بيقول، لو كان يعلم الغيب، كان هيحصل إيه.. كان هيكثر من الحاجات اللي هتجيبله الخير والمصالح والمنافع، وكان تجنب الشر قبل أن يقع.. لكن انا لا اعلم الغيب ولا املك لنفسي ضرا ولا نفعا.
زينهم في الفيلم، قرر انه يخبي جثة امه علشان الفرح ميبوظش.. ويأجل إعلان وفاتها، لان اعلان وفاة الام زي ما قالوله موت وخراب ديار..
يعني هو صرف وكلف والفرح باظ فمحدش هينقط…فبيتظاهر بالفرح عشان بس الليلة تكمل، وهنا بنلاقي حبشي بيرقص على اغنية انا مش عارفني وهو حرفيا عينه مدمعة..
حتى كلمات الاغنية مظبوطة بالشعرة على حالته وموقفه.. رغم إنها مش معمولة للفيلم بس لفقت..
انا مش عارفني.. انا تهت مني.. انا مش انا..
لا دي ملامحي ولا شكل شكلي ولا دا انا..
قوليلي ايه يا مرايتي.. قوليلي ايه حكايتي..
تكونشي دي نهايتي.. واخر قصتي..
ففي نهاية الفيلم.. لما بيعمل جنازة لامه.. المخرج بيعمل فوكس عليه.. وبيخفي كل اللي حواليه.. بيبقوا سواد.. سواد كاشف للحزن في قلبه والحسرة اللي حاسس بيها
ويقول يا ريتني ما عملت كدا.. يا ريتني ما سمعت كلامكم وكملت الفرح.. يا ريتني كنت ريحت جثة امي واكرمتها… فهنا بنشوف نهاية تانية.. ان زينهم بيرفض عرضهم انهم يخبوا الجثة ويقول..
“أنا امي ماتت يا ناس.. يعني كل حاجة حلوة ماتت.. يعني البركة والدعا ماتوا.. انا بس اللي حازز في نفسي انها ماتت زعلانة مني.. الله يلعن ابو الفلوس لابو الجمعيات لابو الفرح لابو الجمعيات لابو الميكروباص.. انزل يا عسلي شطب الفرح وقول للناس الاسطى زينهم امه ماتت.. عليه العوض ومنه العوض”..
فهنا بتخرج صرخة مدوية من مراته “روجينا”.. اللي هي متر ونص.. ومعرفش طلعت الصرخة دي ازاي.. فبتلاقي كل حاجة اتعدلت.. كل حاجة.. ولا باسم سمرة مات.. ولا ابن صلاح وردة شاف ابوه وهو بيتهان وعسلي النبطشي صالح ابوه.. والرقاصة بتتوب.. وكل حاجة مشيت تمام..
فهنا بنسمع الاية الكريمة “قُل لَّا أَمْلِكُ لِنَفْسِي نَفْعًا وَلَا ضَرًّا إِلَّا مَا شَاءَ اللَّهُ ۚ وَلَوْ كُنتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ ۚ إِنْ أَنَا إِلَّا نَذِيرٌ وَبَشِيرٌ لِّقَوْمٍ يُؤْمِنُونَ “..
بالظبط انت وانا وكل الناس محدش بيملك لنفسه اي نفع ولا اي ضرر الا لما ربنا يشاء…ونعم بالله..
فعلا عليه العوض ومنه العوض..
#بهاء_حجازي
